1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
የኢትዮጵያ አየር መንገድና የኢትዮ ቴሌኮም ድርሻ በከፊል ለመሸጥ የተወሰነው የውጭ ምንዛሬ
እጥረትን ለመቅረፍ ነው
June 12, 2018
አዲስ አበባ፣ ሰኔ ፣5፣2010 (ኤፍ.ቢ.ሲ) የኢትዮጵያ አየር መንገድና የኢትዮ ቴሌኮም የባለቤትነት ድርሻ
መንግስት በከፊል ለመሸጥ የወሰነው ኩባንያዎቹ ያጋጠመውን የውጭ ምንዛሬ እጥረት ለመቅረፍ የሚያግዙ መሆናቸው
ታምኖበት እንደሆነ የብሄራዊ የፕላን ኮሚሽን አስታወቀ።

ባለፉት አመታት የወጪ ንግድ ከሚታቀደው በታች መሆን፣ ትላልቅ ፕሮጀክቶችና የልማት ድርጅቶች ወደ ማምረት
አለመግባት፣ የገቢ ምርቶች ፍላጎት በእጅጉ መጨመር እና የውጭ ብድር እዳ ማሻቀብ የሀገሪቱን የውጭ ምንዛሬ እጥረት
እንዳባባሰው ኮሚሽን ይገልፃል።

ሀገሪቱ በሚቀጥሉት 2 አመታት ውስጥ ለነዳጅ፣ ለፍጆታ እቃ፣ ለግሉ ዘርፍና ለኢንቨስትመንት ውጪ፣ ለነባር ፕሮጀክቶች
ማስፈፀሚያና ለውጭ እዳ ብቻ ከ13 ቢሊየን ዶላር በላይ የውጭ ምንዛሬ ያስፈልጋታል።

ለዚህ ችግር መፍትሄ ሆኖ የተገኘው ደግሞ አንዳንድ የልማት፣ የአገልግሎትና የማምረቻ ተቋማት የባለቤትነት ድርሻ ወደ
ግል ይዞታ ማስተላለፍ ወይንም መሸጥ እንደሆነ ኮሚሽነሩ ዶክተር ይናገር ደሴ ይናገራሉ።

እነዚህ የተመረጡት የልማት ድርጅቶች ጥናት የተደረገባቸው ሲሆን፥ ይህንን ችግር ለመቅረፍ የሚያስችል ከፍተኛ የውጭ
ምንዛሬ ያመጣሉ ተብሎ የታመነባቸው እንደሆኑም ጠቁመዋል።

ለረጅም አመታት ሀገሪቱ ለገቢ ምርት እስከ 17 ቢሊየን ዶላር የምታወጣ ቢሆንም የውጭ ንግድ ገቢዋ ከ3 ቢሊየን
የአሜሪካን ዶላር በላይ አለማለፉ ኢኮኖሚውን ጤናማ እንዳይሆን አድርጎታል።

ዶክተር ይናገር እንደሚገልፁት፥ እነዚህን ተቋማት በከፊል ወደ ግል ማስተላለፍ የአጭር ጊዜ የሀገሪቷን የውጭ ምንዛሬ
አቅም ለማዳበር እንጂ የረጅም ጊዜ መፍትሄ እንደማሆን ተነግሯል ።

ለዚህ ችግርም በመንግስት በኩል ዘለቄታዊ መፍትሄ የሚሆነው የውጭ ንግዱን ለማሳደግ መረባረብ እና መስራት
መሆኑንም ገልፀዋል።

በተጨማሪም ግብርናውን ማዘመን፣ ምርትና ምርታማነትን ማሳደግ፣ የማምረቻ ኢንዱስትሪዎችን በማሳደግ በሙሉ
አቅማቸው እንዲያመርቱ ማስቻል እንዲሁም የኢኮኖሚ ሽግግሩን ማፋጠን እንደሚገባ ነው ያነሱት።

የሚገኘውን የውጭ ምንዛሬ ለብክነት የሚዳርጉ ህገ ወጥ ንግድንና የዶላር ጥቁር ገበያን ማስቀረት ይገባል ብለዋል።።

ኮሚሽነር ዶክተር ይናገር ኩባንያዎቹ የታለመላቸውን የገቢ እቅድ እንዲያሳኩ በከፊል ድርሻ በሚኖራቸው ድርጅቶች ላይ
ልዩና ዝርዝር ጥናት ይካሄዳል ብለዋል።

ጥናቱ የባለቤትነት ድርሻ ለመግዛት ፍላጎት ባላቸው የሀገር እና የውጭ ኩባንያዎች ላይ በዝርዝር የሚካሄድ እንደሆ
ገልፀዋል።

ሀገሪቱ የውጭ ምንዛሬ ለማግኘት ይህን ውሳኔ ያስተላለፈች በመሆኑ ለውጭ ኩባንያዎች ቅድሚያ እንደሚሰጥ
ተናግረዋል።።

ይህ ጥናት በከፊል እና ሙሉ በሙሉ ድርጅቶችን የሚገዙ ባለድርሻ አካላት ከኪሳራ ላይ የማይጥሉ፣ በህብረተሰቡ ላይ
የኑሮ ውድነትና ጫና የማያሳድሩ መሆናቸውን ለማረጋገጥ የሚደረግ ጥንቃቄ ነው ተብሏል።

በትዕግሰት ስለሺ
admin@hebrezema.info
1