1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
ኢትዮጵያና ደቡብ ሱዳን በመንገድ ለመተሳሰር እንደሚሰሩ ገለፁ
January 30, 2017
ኢትዮጵያና ደቡብ ሱዳን በመንገድ መሰረተ ልማት ለመተሳሰር እንደሚሰሩ ገለጹ።

የነዳጅ ማጣሪያ መስመር ዝርጋታና መሰል የልማት ፕሮጀክቶችን በጋራ ለመሥራትም ተስማምተዋል።

ጠቅላይ ሚኒስትር ኃይለማርያም ደሳለኝ 28ኛውን የአፍሪካ ኅብረት ጉባዔ ላይ ለመሳተፍ አዲስ አበባ ከገቡት የደቡብ ሱዳን ፕሬዚዳንት
ሳልቫኪር ማያርዲት ጋር በጽህፈት ቤታቸው መክረዋል።

መሪዎቹ ስለ አፍሪካ ቀንድ አካባቢ እንዲሁም በደቡብ ሱዳን ሠላም ማስፈን በሚቻልበት ጉዳይ ላይ ተወያይተዋል።

ጠቅላይ ሚኒስትር ኃይለማርያም እንደገለጹት ኢትዮጵያ ለደቡብ ሱዳን ሠላምና መረጋጋት ከፍተኛ እገዛ እያደረገች እንደምትገኝና በቀጣይም
ይህንኑ አጠናክራ እንደምትቀጥል አረጋግጠዋል።

“ደቡብ ሱዳን በአስቸጋሪ ጊዜ ውስጥ ሆና እንኳን ኢትዮጵያ እንዳልተለየቻት አስታውሰው ይህም በሁለቱ አገሮች መካከል ጠንካራ ግንኙነት
መኖሩን የሚያሳይ ነው” ብለዋል ጠቅላይ ሚኒስትር ኃይለማርም።

“በቅርቡ በሁለቱ አገሮች ዲፕሎማሲያዊ ግንኙነት ላይ ችግር ተፈጥሯል በሚል ሲናፈስ የነበረው ከእውነት የራቀ አሉባልታ ነው" ብለዋል።

የአገራቱን ግንኙነት ይበልጥ ለማጠናከርም በመንገድ መሰረተ ልማት የማስተሳሰር፤ የነዳጅ ማጣሪያ፣ መስመርና መሰል የልማት ፕሮጀክቶችን
በጋራ ለመሥራት መስማማታቸውን ገልጸዋል።

ፕሬዚዳንት ሳልቫኪር በቅርቡ ኢትዮጵያን እንዲጎበኙ ጠቅላይ ሚኒስትሩ የጋበዟቸው ሲሆን ፕሬዚዳንቱም ፈቃደኛ ሆነዋል።

በጉብኝታቸው ወቅትም አገራቱ መሠረታዊ የሆኑ ስምምነቶች እንደሚፈራረሙ ጠቅላይ ሚኒስትር ኃይለማርያም ገልጸዋል።

የደቡብ ሱዳኑ ፕሬዚዳንት ሳልቫኪር ማያርዲት በበኩላቸው፥ ከጠቅላይ ሚኒስትር ኃይለማርያም ጋር በቅርቡ ስለተናፈሰው ወሬ በግልጽ
መወያየታቸውንና ከእውነት የራቀ መሆኑንም ተናግረዋል።

"በአገራቱ መካከል ምንም ዓይነት ወሬ ቢናፈስ መሪዎች ተቀራርበው በመነጋገር ግንኙነታቸውን ይበልጥ ያጠናክራሉ" ሲሉም ፕሬዚዳንቱ
አስታውቀዋል።

ጠቅላይ ሚኒስትር ኃይለማርያም ደሳለኝ ባለፈው ጥቅምት በጁባ የሥራ ጉብኝት ያደረጉ ሲሆን፥ ከፕሬዚዳንት ሳልቫኪር ማያርዲት ጋር
በሁለትዮሽ ግንኙነት ዙሪያ ተነጋግረው ከስምምነት ላይ መድረሳቸው ይታወሳል።

አገራቱ በተለይም በንግድና ኢንቨስትመንት ትስስር፣ በሠላምና ፀጥታ፣ በመሰረተ ልማትና በሌሎችም የጋራ ጥቅሞችን በሚያስጠብቁ ጉዳዮች
ዙሪያ በቅንጅት ለመስራት ተስማምተዋል።

ምንጭ፦ ኢዜአ
admin@hebrezema.info
1