1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
admin@hebrezema.info
መድረክ እና ሰማያዊ ፓርቲ ከኢህአዴግ ጋር ለመወያየት መዘጋጀታቸውን አስታወቁ
January 17, 2017
ገዢው ፓርቲ ኢህአዴግ ሰላማዊ እና ህጋዊ እስከሆኑ ድርስ ከየትኛውም ተፎካካሪ የፖለቲካ ፓርቲዎች ጋር ለመከራከር እና ለመደራደር
ዝግጁ ነኝ ብሏል።

ፓርቲዎቹም ከነገ በስቲያ በውይይቱ አካሄድ እና አጀንዳዎች ዙሪያ ውይይት እንደሚያካሂዱ ይጠበቃል።

ፋና ብሮድካስቲንግ ኮርፖሬት ያነጋገራቸው የኢትዮጵያ ፌዴራላዊ ዴሞክራሲ አንድነት መድረክ እና የሰማያዊ ፓርቲ ሊቀ መናብርት
በረቡዕው ውይይት ለመሳተፍ መዘጋጀታቸውንና የውይይት አጀንዳዎችን እየቀረፁ መሆኑን ተናግረዋል።

ኢህአዴግ የውይይት ቅድመ ውይይቱን ጨምሮ በየትኛውም የውይይት እና ክርክር መደረክ ላይ ማንኛውም በሰላማዊ መንገድ
እየተንቀሳቀሰ ያለ ተፎካካሪ ፓርቲ መሳተፍ ይችላል ብሏል።

ለዚህም የስነ ምግባር ደንብን መፈረም አለመፈረምን ጨምሮ ምንም አይነት መሰፈርት አለመቀመጡን የኢህአዴግ ፅህፈት ቤት ሃላፊው
አቶ ሽፈራው ሽጉጤ መገናገራቸው ይታወሳል።

ጥሪው የቀረበላቸው አብዛኛዎቹ ፓርቲዎችም በውይይቱ ላይ ለመሳተፍ ዝግጁ መሆናቸውን ማሳወቃቸውን የሚያሳዩ መረጃዎች ወጥተዋል።

የመድረኩ ሊቀ መንበር ፕሮፈሰር በየነ ፓርቲያቸው ውጤት ለሚገኝበት የውይይት እና ድርድር መድረክ ዝግጁ ነን ብለዋል።

“ለድርድር ነው የምንቀርበው፤ የድርድር ነጥቦችም አዘጋጅተናል፤ ይህን ሀሳብ የምናቀርብበት ሜዳም ያስፈልጋል” ነው ያሉት ፕሮፌሰር
በየነ።

ፓርቲው በቅድመ ውይይት መድረኩ በቀጣይ መደረግ ስለሚገባው ውይይት ለመምከር ዝግጁ መሆኑንም አንስተዋል።

የሰማያዊ ፓርቲው ሊቀ መንበር አቶ የሺዋስ አሰፋም ለውይይት የሚቀረብ አጀንዳ ማዘጋጀታቸውን ተናግረዋል።

የሰላማዊ ትግል አንዱ አሰራር ውይይት እና ድርድር ነው ያሉት አቶ የሺዋሽ፥ ኢህአዴግ ያዘጋጀው የውይይት መድረክ መፍትሄ ያመጣል
የሚል እምነት እንዳላቸው ተናግረዋል።

ፓርቲዎች ከኢህአዴግ ጋር የሚያደርጉት ውይይት ውጤታማ እንዲሆን ፖለቲካዊ ቁርጠኝነት እንደሚያስፈልግም ጠቁመዋል።

አብዛኛዎቹ ተፎካካሪ ፓርቲዎች ለውይይት የሚቀርቡ እና ለድርድርም የሚሆኑ አጀንዳዎችን መቅረፃቸውን አንስተዋል።

ገዢው ፓርቲ ኢህዴግም የሚፈጠረው መድርክ እንደየርዕሰ ጉዳዩ ውይይትም ድርድርም ሊካሄድበት ይችላል የሚል ሃሳብ አለው።

ተፎካካሪ ፓርቲዎቹም ሆኑ መንግስት መስርቶ ሀገር እየመራ ያለው ኢህአዴግ ለውይይት እና ድርድር የሚሆን አጀንዳ ማዘጋጀታቸውን
ከመግለፅ በስተቀር የያዟቸውን አጀንዳዎች ይዘት ለመናገር አልወደዱም።

የፊታችን ረቡእ የሚካሄደው ውይይትም የቀጣይ ውይይት እና ድረድር አጀንዳዎች እና የውይይት እና አካሄድ ስርአቶች ከየፓርቲዎቹ
እንደሚቀርብበት ይጠበቃል።



በዳዊት መስፍን
www.fanabc.com
1