1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
የሚኒስትሮች ምክር ቤት የአስቸኳይ ጊዜ አዋጁ እንዲነሳ ወሰነ
June 3, 2018
አዲስ አበባ፣ ግንቦት 25፣ 2010 (ኤፍ.ቢ.ሲ) ዛሬ መደበኛ ስብሰባውን ያደረገው የሚኒስትሮች ምክር ቤት
የአስቸኳይ ጊዜ አዋጁ እንዲነሳ ወሰነ።

ምክር ቤቱ በስብሰባው የሀገሪቱን የፀጥታ ሁኔታ ገምግሟል።

አሁን ላይም በሀገሪቱ ስርዓት ሰፍኖ ሰላምና መረጋጋት በመመለሱ የአስቸኳይ ጊዜ አዋጁ እንዲነሳ መወሰኑን የጠቅላይ
ሚኒስትር ልዩ ፅህፈት ቤት ኃላፊ አቶ ፍፁም አረጋ አስታውቀዋል።

የአስቸኳይ ጊዜ አዋጁ እንዲነሳ የሚጠይቅ ረቂቅ የውሳኔ ሀሳብ እንዲፀድቅ ወደ ህዝብ ተወካዮች ምክር ቤት ልኳል።

ረቂቅ የውሳኔ ሀሳቡ በምክር ቤቱ ሲፀድቅ የአስቸኳይ ጊዜ አዋጁ ይነሳል ተብሎ ይጠበቃል።


የኢፌዴሪ መከላከያ ሚኒስትር አቶ ሞቱማ መቃሳ፥ የአስቸኳይ ጊዜ አዋጁ በሃገሪቱ አንዳንድ አካባቢዎች ተፈጥሮ
የነበረውን የፀጥታ ችግር ለመቆጣጠር መታወጁን አስታውሰዋል።

በዚህም ተፈጥረው የነበሩ ችግሮችን የመቆጣጠርና ሰላሙን ወደነበረበት ሁኔታ መመለስ መቻሉን አንስተዋል።

አሁን ላይም ከክልል መስተዳድርና የፀጥታ አካላት እንዲሁም ከፌደራል ፖሊስ እና ከሃገር መከላከያ ሰራዊት ጋር
በተደረገ ውይይት፥ የአስቸኳይ ጊዜ አዋጁ እንዲነሳ ተወስኗል ብለዋል።

ሚኒስትሩ በአንዳንድ አካባቢዎች ላይ አልፎ አልፎ የሚስተዋሉ የፀጥታ ስጋቶችን የአካባቢው የፀጥታ አካላት ከክልል
መስተዳድር ጋር በመነጋገር እንዲቀርፉ ይደረጋልም ነው ያሉት።

ህብረተሰቡም የሰላሙ ባለቤት መሆኑን በመገንዘብ ለአካባቢው ሰላምና ደህንነት ዘብ እንዲቆምም ጥሪያቸውን
አቅርበዋል።


የህዝብ ተወካዮች ምክር ቤት የካቲት 23 2010 ዓ.ም ባካሄደው አስቸኳይ ስብሰባው የሚኒስትሮች ምክር ቤት
የካቲት 9 ቀን 2010 ዓመተ ምህረት ለስድስት ወራት ያወጀውን የአስቸኳይ ጊዜ አዋጅ ማፅደቁ ይታወሳል።

ምክር ቤቱ በኢፌዴሪ ህገ መንግስት አንቀጽ 93 ንዑስ አንቀጽ 1 (ሀ) መሰረት በታወጀው የአስቸኳይ ጊዜ አዋጅ ላይ
ከተወያየ በኋላ በምክር ቤቱ ያፀደቀው።

በህገ መንግስቱና በህገ መንግስታዊ ስርዓቱ ላይ የተጋረጠውን ይህን አደጋ በመደበኛው የህግ ማስከበር ስርዓት
ለመከላከልና ለመቆጣጠር ከማይቻልበት ደረጃ ላይ መድረሱንና ህገ መንግስታዊ ስርአቱን ለመጠበቅ የሚያስችል
የአስቸኳይ ጊዜ አዋጅ ማውጣት በማስፈለጉ ነበር የታወጀው።

የሚኒስትሮች ምክር ቤት ዛሬ ባካሄደው ስብሰባው የሀገሪቱን የፀጥታ ሁኔታ ከገመገመ በኋላ አሁን ላይ በሀገሪቱ ስርዓት
ሰፍኖ ሰላምና መረጋጋት በመመለሱ የአስቸኳይ ጊዜ አዋጁ እንዲነሳ ወስኗል።
admin@hebrezema.info
1