1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
ሙሳ ፋቂ መሃማት የኮሚሽኑ ሊቀ-መንበር ሆኑ
January 30, 2017
የቻዱ ሙሳ ፋቂ መሃማት የአፍሪካ ኅብረት ኮሚሽን ሊቀ-መንበር ሆነው ተመረጡ።

መሃማት እንደ አውሮፓውያን አቆጣጠር ከ2003 እስከ 2005 የቻድ ጠቅላይ ሚኒስትር ሆነው አገልግለዋል።

ከ2007 እስከ 2008 ባለው ጊዜም የአገሪቷ የኢኮኖሚ፣ የማኅበራዊና የባህል ምክር ቤት ፕሬዚዳንት ሆነው ሰርተዋል።

የአገሪቷ የውጭ ጉዳይ ሚኒስትር ሆነው ማገልገላቸውንም ግለ-ታሪካቸው ያሳያል።

ሙሳ ፋቂ የአገሪቷን ሁለት ተቋማት በሚኒስትርነት የመሩና የቻድ የስኳር ኩባንያ ዋና ዳይሬክተር የነበሩም ናቸው።

የፕሬዚዳንት ኢድሪስ ዴቢ ካቢኔ ዳይሬክተርና የ2001 ምርጫ ዘመቻ ኃላፊ ሆነውም አገልግለዋል።

እናም በምርጫው የፈረንሣይኛ ተናጋሪ የአፍሪካ አገራትን ድጋፍ ማግኘታቸው ለመመረጥ እንዳበቃቸው ተገምቷል።

የአፍሪካ ኅብረት ከተመሰረተ የአንድ ጎልማሳ ዕድሜ ይዟል።

ከ54 ዓመት በፊት በአፍሪካ አንድነት ድርጅት ስም የተመሰረተው የአፍሪካውያን ስብስብ እንደ አውሮፓውያን አቆጣጠር ከ2001 ጀምሮ
ወደ አፍሪካ ኅብረት ኮሚሽንነት ተሸጋግሯል።

ወደ አፍሪካ ኅብረት ኮሚሽነት ከተሸጋገረ በኋላ ዶክተር ንኮሶዛና ድላሚኒ ዙማን ጨምሮ አራት ሊቀነ-መናብርት ተፈራርቀውበታል።

አማራ ኤሲ፣ አልፋ ኦማር ኮናሬ፣ ዣን ፒንግና ንኮሳዛና ድላሚኒ ዙማ ደግሞ ኅብረቱን በሊቀ-መንበርነት የመሩ ናቸው።

በዘንድሮው ምርጫ ለሊቀ-መንበርነት ኬንያዊቷ ዶክተር አሚና መሐመድ፣ የቀድሞዋ ጋዜጠኛ ቦትስዋናዊቷ ፔሎኖሚ ቬንሰን-ሞታይ፣
የኢኳቶሪያል ጊኒ አጋፒቶ ምባ ሞኩይንና ሴኔጋላዊው ዶክተር አብዱላይ ባዚልይ እና የምርጫው አሸናፊ የቻዱ ሙሳ ፋቂ መሃማት በዕጩነት
መቅረባቸው ይታወሳል።
admin@hebrezema.info
1