1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
አፍሪካ ከአራተኛው የኢንዱስትሪ አብዮት ተጠቃሚ የምትሆነው አምራች ኃይሏን በማብቃት ነው
October 18, 2016
አዲስ አበባ ጥቅምት 8/2009 አፍሪካ
ከአራተኛው የኢንዱስትሪ አብዮት ተጠቃሚ
የምትሆነው አምራች ኃይሏን በማብቃት
መሆኑን ፕሬዝዳንት ሙላቱ ተሾመ ተናገሩ።

የኢትዮጵያ የንግድና ዘርፍ ማኅበራት ምክር
ቤት ከፓን አፍሪካን ንግድና ኢንዱስትሪ
ምክር ቤት ጋር በመተባባር ዘላቂ የአምራች
ዘርፍ ለኢትዮጵያ ብሎም ለአፍሪካ በሚኖረው
ፋይዳ ላይ ያተኮረ ጉባዔ በአዲስ አበባ
አካሂዷል።

ጉባዔውን በንግግር የከፈቱት ፕሬዝዳንት
ሙላቱ ተሾመ ወደ ኢንዱስትሪ የሚደረግ
መዋቅራዊ ለውጥ ለአምራቹ ዘርፍ ወሳኝ
መሆኑንና ለአገሪቱ የኢኮኖሚ ዕድገት ያለውን
አስተዋጽኦ አስረድተዋል።


ኢትዮጵያም ሆነች አፍሪካ በቴክኖሎጂ እምብዛም ባልደረጀው 3ኛው የኢንዱስትሪ አብዮት ላይ የሚገኙና በዚሁ ላይ
አተኩረው መስራት ያለባቸው ቢሆንም የወቅቱን የዓለም የኢንዱስትሪ አብዮት ጎን ለጎን ማስኬድ እንዳለባቸው
ተናግረዋል።

ሆኖም በአሁኑ ወቅት በኢትዮጵያ የኢንዱስትሪው ዘርፍ ከሌሎች ዘርፎች አንጻር ዝቅተኛ ከመሆኑ ባሻገር የአምራች
ዘርፉ ድርሻም ከ33 በመቶ እንደማይበልጥ ነው የገለጹት።

ከአገሪቱ አጠቃላይ የወጪ ንግድ እንቅስቃሴ በአምራቹ ዘርፍ ተፈብርከው ወደ ውጭ የሚላኩት ከአምስት በመቶ
እንደማይዘሉም በማሳያነት ጠቅሰዋል።

በመሆኑም ከ4ኛው የኢንዱስትሪ አብዮት ተጠቃሚ ለመሆን በመሰረተ ልማትና በአምራች የሰው ኃይል ላይ መስራት
እንደሚገባ አስምረውበታል።

የአምራቹ ዘርፍ አስተማማኝ የኃይል ምንጭ፣ የመገናኛ አገልግሎትና ሌሎች መሰረተ ልማቶች የሚያስፈልጉት መሆኑን
የጠቀሱት ፕሬዝዳንቱ ከዚህ አንጻር ኢትዮጵያ የአፍሪካ የኢንዱስትሪ የኃይል ምንጭ መሆን የሚያስችላት መስመር
ላይ እንደምትገኝ አመልክተዋል።

ዓለም አቀፍ የመኪና አምራች ኩባንያዎች በአፍሪካ አገራት ፋብሪካዎችን እያቋቋሙ መሆኑን በመጥቀስ "የአምራች
ዘርፉ አፍሪካን እየቀየራት ነው" ያሉት ደግሞ የፓን አፍሪካን ንግድና ኢንዱስትሪ ምክር ቤት ፕሬዝዳንት አቶ ክቡር
ገና ናቸው።

እንደ አቶ ክቡር ገለጻ ኢትዮጵያን ጨምሮ የተለያዩ የአፍሪካ አገራት ከአስርት ዓመታት በፊት እርሻ ብቻ
ይታይባቸው የነበሩ መሬቶችን በፋብሪካዎች መሸፈንና የውጭ ቀጥታ ኢንቨስትመንት መሳብ ችለዋል።

ዘርፉ በአህጉሪቱ ለውጥ እያሳየ ቢሆንም የሰለጠነ አምራች የሰው ኃይል እንዲሁም እንደማንኛውም የዓለም አገራት
የዋጋ መዋዠቅና የኃይል አቅርቦት ዋጋ መወደድ ችግር ዘርፉን እየፈተነው መሆኑን ጠቁመዋል።

ችግሩን ለመፍታት በትምህርትና ሥልጠና ላይ ማተኮር፣ ያልተገባ ወጪ የሚያስከትል የመሰረተ ልማት እጥረትና
አላስፈላጊ ቁጥጥሮች እንዲሁም የተንዛዙ አሰራሮችን ማስወገድ እንደሚገባ አስገንዝበዋል።
admin@hebrezema.info
1