1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
አትሌት አልማዝ ከዓመቱ ምርጥ 20 የዓለም አትሌቶች አንዷ ሆነች
October 18, 2016
አትሌት አልማዝ ከዓመቱ ምርጥ 20 የዓለም
አትሌቶች አንዷ ሆነች
አዲስ አበባ ጥቅምት 8/2009 አትሌት
አልማዝ አያና ከዓመቱ ምርጥ 20 የዓለም
አትሌቶች አንዷ ሆና ተመረጠች።

ዓለም አቀፍ አትሌቲክስ ፌዴሬሽኖች ማህበር
በሴቶችና በወንዶች 20 አትሌቶችን የ 2016
ምርጥ ዕጩዎች በሚል ዛሬ ይፋ አድርጓል።

በሪዮ ኦሎምፒክ በ10 ሺህ ሜትር ክብረ
ወሰን በመስበር ለኢትዮጵያ የወርቅ ሜዳሊያ
ያስገኘችው አትሌት አልማዝ አያና ከሴቶች
ምድብ በአንደኝነት ተመርጣለች።

በቤኒሻንጉል ጉምዝ ክልል የተወለደችው የ24
ዓመቷ አልማዝ ሩጫ የጀመረችው በ1 ሺህ
500 ሜትርና በ3 ሺህ ሜትር መሰናክል
ርቀቶች ነው።
ወደ መከላከያ ክለብ ከገባች በኋላ በ5 ሺህ እና በ 10 ሺህ ሜትር ሩጫ ላይ አተኩራ ነው ውጤታማ መሆን
የቻለችው።

አትሌት አልማዝ ለዕጩነት ካበቋት ውጤቶች  መካከል በሪዮ ኦሎምፒክ ያስመዘገበችው ውጤት የሚጠቀስ ነው።

አልማዝ ከ23 ዓመት በፊት በቻይናዊቷ ጁንሺያ ዋንግ ተይዞ የነበረውን ክብረ ወሰን በማሻሻል የወርቅ ሜዳሊያ
ማጥለቋ በቀዳሚነት እንድትመረጥ አስችሏታል።

ከአልማዝ በመቀጠል የከፍታ ዝላይ ተወዳዳሪና ፖለቲከኛው አትሌት ሩዝ ቬታ ከስፔን፣ ኬንያዊቷ የረጅም ርቀት
ተወዳዳሪ ቪቪያን ችሮይት እንዲሁም አሜሪካዊቷ የመሰናክል ተወዳዳሪ ኬንድራ ሀሪሶን በምርጫው ተካተዋል።

በተጨማሪ የረጅም ርቀት፣ የከፍታና የሱልስ ተወዳዳሪዋ ካትሪን ኢቫርጉን ከኮሎምቢያና የረጅም ርቀት ተወዳዳሪ ሩዝ
ጀቬት ከባህሬን በምርጫ ከ20ዎቹ የተካተቱ ሆነዋል።

በወንዶች የአጭር ርቀት ንጉስ አትሌት ዩሴን ቦልትና የ400 ሜትር መሰናክል ተወዳዳሪ ኦማር ሚስሎድ ከጃማይካ፣
የምርኩዝ ዝላይ ተወዳዳሪ ቲያጎ ሲልቫ ከብራዚል፣ የዴክታሎን ተወዳዳሪ አሽቶን ኢቴንና የሱልስ ዝላይ ተወዳዳሪ
ክርስትያን ቴይለር ከአሜሪካ በምርጦቹ ተካተዋል።

እንግሊዛዊው የ 5 ሺህና የ10 ሺህ ሜትር የኦሎምፒክ አሸናፊ ሞ ፋራህ፣ ኬንያዊው የሪዮ ኦሎምፒክ የማራቶን
አሸናፊ ኢሉድ ኪፕቾግና የመሰናክል ተወዳዳሪ ኮንሲሎስ ኪፕሮት እንዲሁም የ800 ሜትር የዓለምና የኦሎምፒክ
ሻምፒዮን ዴቪድ ሩዴሻ ከኬንያ በዕጩነት ቀርበዋል።

በዕጩነት ከቀረቡ 20 አትሌቶች የማህበሩ ምክር ቤት፣ ቤተሰቦችና የአትሌቲክስ ደጋፊዎች በሚሰጡት ድምጽ
ከሁለቱም ፆታዎች ሦስት አትሌቶች በምርጥነት ይመረጣሉ።

ከእነዚህ ውስጥ የዓመቱ ምርጥ አትሌት የሚሆኑ አንድ ወንድና አንድ ሴት አትሌቶች በታህሳስ መጀመሪያ በሞናኮ
ይፋ የሚደረጉ ይሆናል።

በሴቶች ምድብ አትሌት ገንዘቤ ዲባባ ከኢትዮጵያ፣ በወንዶች አሜሪካዊው የዴክታሎን ተወዳዳሪ አሽቶን ኢቴን የ
2015 ምርጥ የዓለም አትሌቶች ተብለው መመረጣቸው ይታወሳል።

ምንጭ፦ ኢዜአ
admin@hebrezema.info
1