1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
admin@hebrezema.info
የከተማ አስተዳደሩ አዲስ ባዘጋጀው መሪ ፕላን ላይ ውይይት ማካሄድ ጀመረ
January 22, 2017
የአዲስ አበባ ከተማ አስተዳደር አዲስ ባዘጋጀው የ25 ዓመት መሪ ፕላን ላይ ከመዲናዋ ነዋሪዎች ጋር ውይይት ማካሄድ ጀመረ።

በአዲስ አበባ ከተማ ዘጠኝ መሪ ፕላኖች በተለያዩ ጊዜያት ተዘጋጅተው ተተግብረዋል፤ የአሁኑ መሪ ፕላን ከዚህ ቀደም በተዘጋጁ መሪ
ፕላኖች አዘገጃጀትና ትግበራ የታዩ ጉድለቶችን በማሟላት የተዘጋጀ ነው ተብሏል።

በመሪ ፕላኑ በትግባራ ሂደት የተገኘ ልምድ እንደተካተተበትም ተገልጿል።

የከተማ አስተዳደሩም ከ2017 እስከ 2032 ዓ.ም ድረስ ተግባራዊ የሚደረገውን መሪ ፕላን ለከተማዋ ነዋሪዎች በማስተዋወቅ ግብዓት
የማሰባሰብ ዓላማ አድርጓል።

ለዚህም እቅዱ ተግባራዊ ከመደረጉ በፊት ከመዲናዋ ነዋሪዎች ጋር በተዘጋጀው መሪ ፕላን ላይ የጋራ መግባባት ለመፍጠር ያለመ ውይይት
እያካሄደ ነው።

ፋና ብሮድካስቲንግ ኮርፖሬት በተገኘባቸው ቂርቆስና አራዳ ክፍለ ከተሞች በተደረገው ውይይት፥ መሪ ፕላኑ ሊያካትታቸው በሚገቡና
በትግበራ ሂደት ሊደረጉ የሚገቡ ጥንቃቄዎች ላይ ከተወያዮቹ ሃሳብ ተሰንዝሯል።

ነዋሪዎቹም መሪ ፕላኑ ተግባራዊ ከመደረጉ በፊት ውይይት መደረጉ ግንዛቤን በመፍጠር የባለቤትነት ስሜት ያዳብራል ብለዋል።

ከነዋሪዎች ቁጥር መጨመር ጋር ተያይዞ ሊፈጠር የሚችልን ችግር ለመቅረፍ፥ ከአዲስ አበባ ውጭ በየአካባቢው ተመጣጣኝ እድገት ሊኖር
ይገባልም ነው ያሉት።

መሪ ፕላኑ በሁሉም የኢኮኖሚ ደረጃ የሚገኙ የህብረተሰብ ክፍሎችን በተገቢው ማካተቱ በደንብ መረጋገጥ እንዳለበትም አንስተዋል።

በውይይቶቹ ላይ የተገኙት የስራ ሃላፊዎች በበኩላቸው፥ የተነሱ ሃሳቦች በመሪ ፕላኑ ምላሽ እንዲያገኙ መደረጉን ተናግረዋል።

በተጨማሪም መሪ ፕላኑ ከነዋሪዎቹ ያልተነሱና በቀጣይ ሊገጥሙ የሚችሉ ተግዳሮቶችን አስቀድሞ በመተንተን የተዘጋጀ መሆኑንም ነው
የተናገሩት።

ከዚህ አንጻርም መሪ ፕላኑ ወደ ትግበራ ከመሸጋገሩ አስቀድሞ መሰል ውይይቶች መካሄዳቸው እንደሚቀጥልም ገልጸዋል።
1