1
    HEBREZEMA.INFO
    INDEPENDENT NEWS & MEDIA
    DESIGNED BY ZEWDU TEKLU
    © COPYRIGHT. ALL RIGHTS RESERVED 2007.
አዲስ አበባ፣ ነሃሴ 10፣ 2009 (ኤፍ.ቢ.ሲ) በደቡብ ክልል በ2009 ዓ.ም ከሙስና እና ብልሹ አሰራር ጋር
በተያያዘ ክስ በተመሰረተባቸው 413 ተከሳሾች ላይ እስከ 17 ዓመት የሚደርስ ፅኑ እስራት ቅጣት መተላለፉን የክልሉ
የመንግስት ኮምዩኒኬሽን ጉዳዮች ጽህፈት ቤት ገለፀ።

በክልሉ በጥልቅ ተሃድሶው ወቅት በተካሄደው የፀረ ሙስና እና ብልሹ አሰራር እንቅስቃሴ በተጋለጡት ግለሰቦች ላይ
እርምጃ መወሰዱን ነው ጽህፈት ቤቱ ዛሬ በሰጠው መግለጫ ያስታወቀው።

የጽህፈት ቤቱ ሃላፊ አቶ ሰለሞን ሀይሉ፥ እስካሁን በ3 ሺህ 134 ግለሰቦች ላይ እርምጃ እንደተወሰደባቸው ተናግረዋል።

ከእነዚህም ውስጥ አብዛኞቹ ፖለቲካዊ እርማጃ የተወሰደባቸው ሲሆን፥ አስተዳደራዊ እና ህጋዊ እርምጃ እንደተወሰደም
ገልጸዋል።

ሙስና ብልሹ አሰራር በመፈፀም የመንግስትን እና የሕዝብን ጥቅም ያሳጡ ግለሰቦች ላይ 211 መዝገብ ተከፍቶ 413
ተከሳሾች ላይ ህጋዊ ውሳኔ እንደተሰጠባቸውም አቶ ሰለሞን ተናግረዋል፡፡

በዚህም ከ17 ዓመት ፅኑ እስራት እስከ እስከ 3 ወር ቀላል እስራት እና ከ105 ሺህ 300 ብር የገንዘብ ቅጣት
እንደተጣለባቸው ገልፀዋል፡፡

291 ሚሊዮን 299 ሺህ 512 ብር ከምዝበራ ማዳን ተችሏል ያሉት ሃላፊው፥ ገንዘቡ ተመዝብሮ በክትትል እንዲመለስ
የተደረገ እና በጥቆማ ቀድመ መከላከል የተቻለ መሆኑንም ገልፀዋል።

ከሙስና ጋር በተያያዘ መኖሪያ ቤቶች፣ ባለ ሁለት እና ባለ አራቅ ወለል ህንፃዎች፣ ፔኒሲዮን፣ ጥሬ ገንዘብ እና
ተሸከርካሪዎች መታገዳቸውንም አቶ ሰለሞን አስታውቀዋል።

ከገንዘብ ባሻገር በገጠር 10 ሺህ ሄክታር እና በከተማ 1 ሚሊየን ካሬ ሜትር መሬት ተመላሽ መደረጉንም ገልፀዋል፡፡

ህዝቡ ችግሮችን በማጋለጥ ረገድ ዋንኛ ተሳታፊ ነበር ያሉት አቶ ሰለሞን፥ የህዝብ ተሳትፎ ተጠናክሮ የሚቀጥልበት ምቹ
ሁኔታ መፈጠሩንም ተናግረዋል።

እስካሁን የተወሰደው እርምጃ መነሻ እንጂ በቂ ባለመሆኑ በተያዘው የፀረ ሙስና እና ብልሹ አሰራር ትግል ተጠናክሮ
ይቀጥላል ብለዋል፡፡
admin@hebrezema.info
1